அடிப்படைவாத செயற்பாடுகளுக்காக கைது செய்யப்படுவோர்க்கு புனர்வாழ்வளிக்கும் சட்ட விதிகளுக்கான விசேட வர்த்தமானி அறிவிப்பு!



அடிப்படைவாத செயற்பாடுகள் தொடர்பாக சரணடையும் அல்லது கைது செய்யப்படும் நபர்களுக்கு புனர்வாழ்வு அளிக்கும் சட்டவிதிகள் உள்ளடக்கப்பட்ட விசேட வர்த்தமானி அறிவித்தல் வெளியிடப்பட்டுள்ளது.

பயங்கரவாத தடுப்பு (தற்காலிக ஏற்பாடுகள்) ஒழுங்கு விதிகள் அடங்கிய வர்த்தமானி ஜனாதிபதி கோத்தபய ராஜபக்ஷவின் கையொப்பத்துடன் மார்ச் 12ஆம் திகதி வெளியிடப்பட்டது.

இதன்படி பொலிஸ் அதிகாரியல்லாத எவரேனும் ஒருவரிடம் சரணடையும் ஒருவர் அண்மையில் உள்ள பொலிஸ் நிலைய பொறுப்பதிகாரியிடம் 24 மணித்தியாலங்களுக்குள் ஒப்படைக்கப்பட வேண்டும்.

விசாரணை நடத்துவதற்காக சம்பந்தப்பட்ட நபரை தடுத்து வைத்துக் கொள்ள வேண்டுமா என்பதை பரிசீலிப்பதற்கு அந்த பொலிஸ் நிலைய பொறுப்பதிகாரி அமைச்சருக்கு அறிக்கை சமர்ப்பிக்க வேண்டும்.

சம்பந்தப்பட்ட நபர் குற்றமிழைத்துள்ளமை உறுதியாகுமாயின் சட்ட நடவடிக்கை எடுப்பதற்காக சட்டமா அதிபரிடம் அந்நபரை முன்னிலைப்படுத்த வேண்டும். குற்றத்தின் தன்மைக்கு அமைவாக அந்த நபருக்கு எதிராக வழக்கு தொடராமல் புனர்வாழ்வு மத்திய நிலையத்தில் புனர்வாழ்வு அளிப்பதற்கு தகுதியுடையவர் என்பது சட்டமா அதிபரின் நிலைப்பாடாக இருக்கலாம் என்றாலும் நீதவான் முன்னிலையில் ஆஜர்படுத்தப்பட வேண்டும்.

அந்த நபருக்கு எதிராக முன்வைக்கப்படும் காரணங்களை ஆராய்ந்து ஒரு வருடத்திற்கு மேற்படாத காலத்துக்கு புனர்வாழ்வு அளிக்க உத்தரவிட வேண்டும் புனர்வாழ்வு அளிக்கப்படும் காலம் முடிந்த பின்பு அதன் பெருபேற்றை பரிசீலித்து விடுதலை செய்யவோ மேலதிகமாக புனர்வாழ்வளிக்கவோ பரிசீலித்து பார்க்கவோ வேண்டும் என்பதோடு அதற்காக புனர்வாழ்வு ஆணையாளர் நாயகம் அமைச்சின் செயலாளர் அறிக்கை சமர்ப்பிக்க வேண்டும்.

நீடிக்கப்படும் புனர்வாழ்வு கால எல்லையி ன் முடிவில் குறித்த நபர் விடுவிக்கப்பட வேண்டும் என்றும் அந்த வர்த்தமானி அறிவித்தலில் தெரிவிக்கப்பட்டுள்ளது.