பாடசாலைகளை மீண்டும் ஆரம்பிப்பது தொடர்பான கல்வி அமைச்சரின் தீர்மானம்.

கொரோனா வைரஸ் காரணமாக மூடப்பட்டுள்ள பாடசாலைகளை மீண்டும் ஆரம்பிப்பது தொடர்பான இறுதித் தீர்மானம் எதிர்வரும் வார இறுதியில் எடுக்கப்படும் என்று பேராசிரியர் ஜி.எல்.பீரிஸ் தெரிவித்துள்ளார்.


கொழும்பில் இன்று(2) இடம்பெற்ற செய்தியாளர் மாநாட்டில் அமைச்சர் இதனை தெரிவித்துள்ளார். பாடசாலைகளின் மூன்றாம் தவணை எதிர்வரும் ஒன்பதாம் திகதி ஆரம்பமாகவுள்ளது. இது பற்றி விரிவாக ஆராய்ந்து அதன் பின்னர் உரிய தீர்மானம் எடுக்கப்பட உள்ளது.மாணவர்களின் சுகாதார பாதுகாப்பிற்கு முக்கியத்துவம் அளித்து தீர்மானம் மேற்கொள்ளப்படும் என்றும் அவர் கூறியுள்ளார்.

அமெரிக்க இராஜாங்க செயலாளரின் இலங்கை விஜயம் தொடர்பான உண்மையான தகவல்கள் அனைவருக்கும் தெரிவாகியுள்ளன.இருதரப்பு உறவுகளை வலுப்படுத்தும் நோக்குடன் இந்த விஜயம் இடம் பெற்றதாகவும் அவர் மேலும் தெரிவித்தார்.

இதேவேளை பாடசாலைகளின் மூன்றாம் தவணைக் கல்வி நடவடிக்கைகள் ஆரம்பிப்பது தொடர்பிலான விசேட பேச்சுவார்த்தை இணையவழி மூலம் இன்று நடைபெற்றது.

இந்த பேச்சுவார்த்தையில் கல்வி அமைச்சின் செயலாளர்,மேலதிக செயலாளர்,மாகாண கல்விப் பணிப்பாளர் உள்ளிட்ட உயர் அதிகாரிகள் பலர் கலந்து கொண்டனர்.

மேல் மாகாணம் உள்ளிட்ட 118 பொலிஸ் பிரிவுகளில் பிறப்பிக்கப்பட்டுள்ள தனிமைப்படுத்தல் ஊரடங்கு சட்டம் எதிர்வரும் 9ஆம் திகதிவரை அமுலில் இருக்கும். கல்வி பொது தராதர உயர்தர பரீட்சை மற்றும் பாடசாலை விடுமுறைக்கு பின்னர் பாடசாலைகளை மீண்டும் திறப்பதற்கு எதிர்வரும் 9ம் திகதி திட்டமிடப்பட்டிருந்தது.

நாட்டின் நிலைமை தொடர்பில் இறுதி வரையில் கண்காணித்து அதற்கமைவாக எதிர்வரும் வார இறுதியில் நாட்டில் நிலவும் நிலைமையை கருத்தில் கொண்டு பாடசாலைகளை மீண்டும் ஆரம்பிப்பது தொடர்பில் தீர்மானம் மேற்கொள்ளப்பட இருப்பதாக அதிகாரி ஒருவர் தெரிவித்துள்ளார்.